STYRKUR NÝLIÐANS

Svanna býður sig fram sem málsvari þeirra sem minnst mega sín

Svanfríður Guðrún Bergvinsdóttir, Samfylkingin

Hver, hvar, hvernig, hvenær? Hver ert þú og af hverju ertu í framboði og hvað
gerirðu og þar fram eftir götunum?

Ókei. Ég heiti Svanfríður Guðrún Bergvinsdóttir, kölluð Svanna, og er 32 ára. Ég er
fæddur og uppalinn Ísfirðingur, búin að búa í Hnífsdal núna síðustu tíu árin ásamt
eiginmanni mínum, Steinari Bjarka Marinóssyni og dætrum okkar, Júlíu Sif, sem er á
níunda ári, og Marín Rún, sem er að verða sjö ára.

Ég hef verið að vinna í hinum ýmsu þjónustustörfum í gegnum tíðina, frá fjórtán ára
aldri. Ég er búin að vinna á bensínstöðinni úti í Bolungarvík, bensínstöðinni hérna á
Ísafirði, í Gamla bakaríinu… Svo var ég aðstoðarverslunarstjóri í Bónus í mjög skamma
stund, áður en ég fór að eignast börnin mín. Svo hef ég verið í símsvörunarþjónustu
nýverið, en núna er ég í fjarnámi í viðskiptafræði.

Svo er ég nú formaður ASÍ-UNG, sem að eru samtök ungs launafólks innan ASÍ.

Ég fór sem fulltrúi frá VerkVest þangað inn. Vinnan þar er rosalega skemmtileg og
gefandi, maður er inni í allskonar málum og reynir eins og hægt er að tala máli ungs
vinnandi fólks og vinna málstað þeirra gagn. Þú veist, gera lífið þeirra betra.

Er það er í gegnum ASÍ sem þú gengur í Samfylkinguna?

Fyrir síðustu Alþingiskosningar byrjaði Samfylkingin að teygja út höndina aftur til
verkalýðshreyfingarinnar, að reyna að svona vekja aftur þær rætur.

Til dæmis bauð Samfylkingin fulltrúum ASÍ-UNG að koma með í Norden skólann, sem
að er samkunda sem verkalýðsfélögin á Norðurlöndunum og sósíaldemókratar standa
að saman. Ég fór þangað ásamt fulltrúum frá flokknum og eftir að hafa kynnast þeim og
hvernig þau eru að hugsa, þá fattaði ég að maður getur haft áhrif á hvað er að gerast,
þó maður sé kannski ekki sammála öllu. Ég hafði aldrei staðsett mig neitt í pólitík þegar
þetta var.

Þannig að ég skráði mig í flokkinn haustið eftir það og hóf að starfa innan hans að
mínum hugðarefnum..
Já, og svo ertu allt í einu bara orðin oddviti. Kemur þetta svolítið flatt upp á þig
eða hvað?

Ég náttúrulega ætlaði ekki að vera á lista fyrst, en var svolítið spennt fyrir
nefndastarfinu. Af því að það er eitthvað sem ég þekki vel úr starfinu í ASÍ. Náttúrulega
sitjum við í starfsnefndum hjá miðstjórn þar og fáum að hafa áhrif á málin þannig.
Þannig að mig langaði til þess að reyna gera svipað núna, til að vinna ungu vinnandi
fólki gagn.

Svo var ég töluð inn á að fara inn á listann. Ég vildi bara passa að vera nógu neðarlega,
þannig að ég væri ekkert að fara í bæjarstjórn. Svo varð það nú samt einhvern veginn
þannig að ég var komin í þriðja sætið, í upprunalegu röðinni. Og eftir nánari umhugsun
bauð ég uppstillingarnefndinni að, ef þau vildu setja unga konu úr
verkalýðshreyfingunni í oddvitasætið, þá væri ég tilbúin að taka það skref. Ef það væri
listanum til heilla.

Þeim fannst það boð koma fullseint, listinn var klár og ákvörðunin var að birta hann eins
og hann stóð. Svo fór það eins og það fór, og þegar raðað var upp aftur var ég komin í
fyrsta sætið.

Þetta er svolítið flókin saga. En það sem upp úr stendur er að andinn hefur verið
rosalega góður og samstarfið virkað mjög vel.

ENDALOK Í-LISTANS, UPPGANGUR Í ÍSAFJARÐARBÆ

Af hverju hætti Í-listinn?

Heyrðu, það bara náðist því miður ekki áframhaldandi samstarfsgrundvöllur þar.

Það var vilji til þess að halda Í-listanum áfram. Og það hefði verið frábært. Ég held að
allir hafi viljað það. Við vorum þrír flokkar sem komum að þessu samstarfi og allir lögðu
fram sínar kröfur. Við settum fram kröfu, sem var þó sveigjanleg. Kannski var hún há, en
samt alveg í takt við fylgi flokkanna á landsvísu.

Hinir tveir flokkarnir fannst okkur gera full ósveigjanlegar kröfur, sem okkur fannst erfitt
að samþykkja. Þá dró annar af hinum flokkunum sig til baka og svo varð bara
samkomulag okkar á milli að flokkarnir færu sínar eigin leiðir.

Hverjir telur þú vera kosti Ísafjarðarbæjar til búsetu, lífs og starfa?

Eins og ég segi, ég er náttúrulega fædd og uppalin hérna, fyrir mig er þetta náttúrulega
bara heima, þú veist. Ég elska einhvern veginn stærðina á bænum. Ég elska að geta
hleypt börnunum mínum út og geta boðið þeim upp á þetta umhverfi. Mér þykir vænt
um þennan stað.

Svo er núna búinn að vera uppgangur, fólk er að flytja í bæinn og hann er að fyllast af
lífi og fjöri. Og þá er mikilvægt að beina þessum vexti í þann farveg að þetta virki fyrir
fólkið. Að við séum ekki bara að liðka fyrir stóru aðilunum, heldur látum við þetta
haldast í hendur, þannig að fólkið og samfélagið séu að græða á þessum vexti.

Það er okkar áhersla.

Hvað finnst þér, þegar þú lítur til baka yfir síðustu 25 árin, hvað finnst þér hafa
verið vel gert á þessari öld við stjórn bæjarins og hvar hefur pottur verið brotinn?
Er eitthvað sem stendur upp úr?

Ég skal bara viðurkenna, að ég hef í gegnum tíðina oft bara átt fullt í fangi með að eiga
við sjálfan mig og þú veist, mitt nánasta, þannig að maður fylgist ekkert alltaf með öllu
sem er í gangi.

En það sem að svona hefur tekið eftir. Það hefur náttúrulega Verið mikil sala á eignum
bæjarins. Loksins þegar var byggð þessi blokk, þá var hún seld. Bærinn er svo búinn
að vera að selja leiguíbúðirnar sínar, sem hefur komið illa við ungt fólk sérstaklega. Ég
allavega þekki til aðila sem hafa þurft að fara úr bænum í kjölfarið.

Svo virðist skorta á viðhaldið víða, það er orðið svolítið dapurlegt útlit á eignum
bæjarins og í umhverfinu. Mér hefur ekki fundist nógu vel að staðið þar.

Á móti kemur að það eru alveg fullt af verkefnum sem maður heyrir af sem hafa verið
rosalega jákvæð og vel unnin. Ég er til dæmis mjög ánægð að það sé verið að fara í
þessa vinnu við menntastefnuna, svo komin inn hérna forvarnastefna og það hefur
tekist að greiða niður skuldir og fleira.

Það er búið að búa til umhverfi fyrir tækifæri. Nú þarf bara að leiða þetta rétt áfram,
held ég.

Hvort viltu frekar leggja áherslu á sterkari þjónustustarfsemi sveitarfélagsins eða
lægri gjöld og álögur?

Sterkari þjónustu.

BYGGJUM NÝJAN LEIKSKÓLA
Hverjar sérðu fyrir þér sem helstu áskoranir og hvaða markmiðum viltu ná
varðandi annars vegar leikskólamál, svo íþróttaaðstöðu og atvinnusköpun hins
vegar?

Varðandi leikskólamálin, þá vantar okkur pláss til að taka á móti fleiri börnum. Á meðan
vinnumarkaðurinn og kerfið okkar eru þannig uppsett að það sé strax tekjutap við að
fara í fæðingarorlof, þá verður leikskólinn að geta tekið við börnum strax við 12 mánaða
aldurinn. Og til þess að tryggja það vantar okkur bæði húsnæði og mannskap.

Við erum á því að það þurfi að byggja nýjan leikskóla. Við viljum ekki vera að stækka og
þrengja meira að þeim svæðum þar sem þeir eru núna. Sérstaklega ekki hjá Sólborg, af
því að þar er mikil og mikilvæg þjónusta í kring. Það myndi þrengja að möguleikum hjá
Eyri, elliheimilinu, menntaskólanum og sjúkrahúsinu.

Við erum á því að það þurfi bara að byggja nýja einingu og gera það hratt og vel. En
svo er landlægt vandamál að fá inn leikskólakennara. Við erum með rosalega lágt
hlutfall af kennurum hérna og erfitt að fá starfsfólk yfir höfuð. Það er að einhverju leyti
tekið á þessu í menntastefnunni, bara flott skref sem hafa verið tekin þar.
Menntaskólinn var fljótur að stökkva til og er að bjóða upp á nám. Fræðslumiðstöðin er
að bjóða upp á raunfærnimat og einhvers konar brú.

Þannig að það er frábært, en það sem við viljum í rauninni reyna að bæta í þennan
pakka er að okkur langar í samstarf við háskólana, þannig að fólk geti sótt lotur nær
heimabyggð. Við viljum koma upp einhverju slíku kerfi hérna á Vestfjörðum. Af því það
er mikil áskorun fyrir t.d. leikskóla að manna sig á meðan starfsfólkið er í námslotum.
Og svo er það erfitt fyrir fólkið sjálft, að fara frá fjölskyldu og vinnu í svona langan tíma.

Sömuleiðis hafa kjarasamningar gefið kennurunum aukin réttindi, sem eru þessar
vinnustyttingar og undirbúningstími. Þeim hafa því miður ekki fylgt mannskapur til að
fylla í gatið sem myndast. Þannig að allir þurfa bara að hlaupa hraðar. Í staðinn fyrir að
vera þessi kjarabót sem þetta á að vera, þá er þetta bara að valda meiri streitu. Þannig
að okkur finnst rétta skrefið þarna vera að auka mannskapinn.

Við viljum fara að endurskoða líka hvernig áhrifin af gjaldskránni og þeim breytingum
sem voru gerðar fyrir nokkrum árum eru að orka bæði á foreldra og leikskólastarfsfólk.

Skráningardagar og slíkt?
Já. Fyrir t.d. fólk í vaktavinnu þá er þetta mjög tæpt. Þau eru kannski að fá vaktaplanið
sitt tveimur, þremur dögum áður en þú þarft að vera búinn að skila hvort þú ætlar að
nota skráningardaginn. Svo erum við með sumarlokanirnar á nákvæmlega sömu tímum.

Það slekkur náttúrulega á öllu og leggst þungt á vinnustaði eins og sjúkrahúsið. Þannig
að það er eitthvað sem okkur finnst verða að endurskoða.

Svo sjáum við í tölum um fæðingarorlof og alls staðar þar sem kemur að umönnun, þá
eru þetta konur sem eru að fara út af vinnumarkaðnum og þetta skerðir þeirra kjör til
frambúðar. Þær eru þá lengur að fá launahækkanir, þær eru ekki að vinna sér inn
viðbótarlífeyri og eru bara í verri stöðu. Þannig að mér finnst þurfa að endurskoða
akkúrat þessa gjaldskrá út frá því.

Við vitum það að það er gott fyrir börnin að vera meira með foreldrunum, en þetta
umhverfi sem er í dag á almennum vinnumarkaði býður ekkert endilega upp á það.

Kannski heyrist á því hvað ég tala mikið um þetta, að ég er búin að vera að hugsa um
þessi mál í mörg ár og fylgjast með. En sömuleiðis þá eru þessar mismunandi útgáfur
sem sveitarfélög hafa gefið út, eins og Kópavogs-módelið, þær verða mest til þess að
ýta láglaunakonum út af vinnumarkaði. Þetta er að koma verst við láglaunafólk.

Svo eru þessir afslættir sem að koma inn. Þeir henta helst þeim sem eru bara á algjöru
láglaunakaupi eða í undir 100% vinnu á láglaunakaupi. Ég vil að þetta kerfi virki fyrir
alla, ekki það bara að við séum að gefa afslátt þeim sem að eru með sveigjanleika í
vinnu. Því viljum við fara í endurskoðun á því öllu.

NÝTUM ÞAÐ SEM VIÐ EIGUM

Varðandi íþróttamál, þá erum við ekki með neinar stórar uppbyggingar á teikniborðinu
núna sem við stefnum að á tímabilinu. Við viljum fara í framtíðarskipulagningu á
Torfnessvæðinu og skoða hvað er hægt að gera þar til þess að nýta svæðið betur.

Í millitíðinni viljum við auka í rauninni áherslu á að nýta það sem við eigum. Við viljum
auknar almenningssamgöngur á milli kjarnanna og sjáum fyrir okkur að skoða í
samstarfi við íþróttahreyfinguna hvaða greinar gætu mögulega nýtt íþróttahúsin sem við
eigum í hinum byggðakjörnunum. Þannig mætti létta aðeins á Íþróttahúsinu á Torfnesi,
sem er umsetið og annar ekki eftirspurn.

Það er svolítið það sem við erum að horfa á á þessu tímabili í því. Náttúrulega væri
gaman að geta byggt hér almennilegt íþróttahús — og ef að fólksfjölgun heldur áfram,
þá verður eiginlega að setja slíkt á teikniborðið á næstu árum. En það er ekki inni í
myndinni hjá okkur eins og er.

BYGGJUM MIKIÐ OG HRATT

Varðandi atvinnusköpun, þá er mín upplifun sú að atvinnulífið hérna sé í uppgangi. Við
erum að fá alls konar fólk hingað, sem vill vinna alls konar störf og okkur langar í frekara
samtal við atvinnulífið og jafnvel að reyna að vinna einhvers konar atvinnustefnu og
finna hvernig best er að stuðla að áframhaldandi vexti.

Að því sögðu finnst mér grunnurinn að atvinnumálunum vera húsnæðismarkaðurinn. Ég
meina, það er fullt af vinnu að hafa, en minna af fólki. Þannig að þess vegna erum við
rosa mikið að horfa á húsnæðismarkaðinn. Það þarf að byggja og það þarf að byggja
hratt, en það verður auðvitað að vera vel gert og vel staðið að því.

Kannski stærsta gatið sem að við sjáum hér er leigumarkaðurinn. Okkur langar til þess
að fara í samtal við óhagnaðardrifin leigufélög. Við sjáum fyrir okkur að þannig gætum
við komið af stað öruggum leigumarkaði, sem hentar þá fyrir bæði þá sem vilja flytja
hérna í bæinn, en kannski ekki kaupa alveg strax, og eru í þannig aðstæðum að geta
hoppað inn í þessi kerfi. Við sjáum fyrir okkur að þetta auki kannski líka hreyfinguna á
almenna markaðnum.

Það þarf líka að koma af stað byggingu á 60 plús íbúðum, fyrir fólk sem vill minnka við
sig. Það myndi líka hreyfa við fasteignamarkaðnum, þannig að fleira fólk kæmist inn. Ég
held að kannski mesta áskorunin í atvinnumálunum núna sé bara að koma fólkinu fyrir
sem hyggst vinna í þessum fyrirtækjum.

Auk þess þarf auðvitað að tryggja betri aðgang að raforku á svæðinu.

EINFÖLDUM KERFIÐ

Hvaða áherslur hyggist þið leggja í mannauðsmálum til að styrkja stöðu
bæjarins?

Núna starfar einn mannauðsstjóri hjá sveitarfélaginu með, hvað, 400 starfsmenn. Við
þurfum að geta mætt þörfum starfsfólksins og virkjað það, þannig það nýtist sem best
og því líði sem best. Og ég held að það verði m.a. unnið með því að efla
mannauðsdeildina, þannig hún hafi betri yfirsýn og sé í betri aðstöðu til að bregðast við
og halda utan um starfsfólkið.
Ein af okkar áherslum varðandi skipulagsmálin er að við viljum einfalda kerfið, þannig
að fólk og fyrirtæki sem vilja fara í einhvers konar uppbyggingu hafi bara einn
tengipunkt sem að getur bara leiðbeint þeim um kerfið. Þannig getum við forðast að
fólk fái misvísandi upplýsingar frá mismunandi aðilum, heldur getur það gengið að
upplýsingapakka. „Hérna er það sem þú þarft að gera.“ Svo verður eftirfylgni, þar sem
fólki er hjálpað að tikka í boxin og koma málum í höfn.

Takið þið afstöðu til símanotkunar í skólum?

Nei, við höfum ekki gert það. Okkur skilst að það hafi verið kallað eftir því að það yrði
símalaus skóli hérna á Ísafirði allavega, þó það hafi ekki verið mikið rætt í hinum
kjörnunum. Ef vilji foreldra stendur til þess að prófa það, þá sé ég ekkert af því.

Hver er fyrirhuguð stefna í málefnum grunnskólans? Nú skilst mér að árangur
Grunnskólans á Ísafirði í PISA-könnunum sé t.a.m. ekki til sem bestur. Er það
ásættanlegt? Hvernig er hugmyndin að bregðast við því?

Þarna komum við að mínu mati svolítið aftur í mannauðsmálin. Við þurfum að hafa aðila
sem hefur tíma til þess að fara að tala við starfsfólkið okkar og þá sem eru með
þekkingu og reynslu og eru þarna að lifa og hrærast inni í þessu. Þau sjá vandamálin og
vita hvað er að gerast. Og þá getum við unnið með þeim til að greiða úr þessu.
Kennararnir okkar eru rosalega mikilvægir og það er nauðsynlegt að þeim sé búið gott
og gefandi starfsumhverfi. Við þurfum að setjast með stjórnendum og greina hvað má
betur fara, bæði fyrir starfsfólkið okkar og börnin.

PLÁSTRAÐ Á VANDAMÁL

Kemur til greina að setja einhverja mælikvarða á starf skólans, samanber
könnunina Skólapúls sem var lögð af á sínum tíma? Hvað vill Samfylkingin gera til
að fylgjast með mikilvægustu stofnunum bæjarins?

Heyrðu, þetta er bara eitthvað sem ég er ekki komin svo langt að hugsa um. Mér finnst
það samt mjög sniðug hugmynd. Það væri sjálfsagt hægt að setja upp eitthvað kerfi í
samstarfi við kennara sem gerir okkur kleift að fylgjast betur með og mæla virkni og
árangur.

Nú var á sínum tíma lögð mikil vinna í að byggja upp faglegt starf í Tanga, sem
farið var í af þörf sem þótti brýn. Eru lyktir þess máls ásættanlegar? Er ekki aftur
verið að halda aftur í sama farið?
Ef ég ætla bara að tala út frá minni eigin reynslu, þá er þetta misjafnlega erfitt fyrir
krakka. Það er stór breyting að fara af leikskólanum og á Tanga. Fyrir annað minna
barna var það mjög erfitt ferli, sem tók allan veturinn að komast í gegnum. Og svo kom
næsta stóra breyting, að fara í grunnskólann. Ég veit að margir foreldrar hafa upplifað
eitthvað svipað.

Ég tek því undir það viðhorf að þessi tilhögun sé erfiðari fyrir börnin.

En þetta mál er dálítið angi af fortíðinni, þar sem við höfum sífellt verið að setja plástra á
vandamál. Þegar grunnskólinn sprengdi síðast undan sér, þá var Kaupfélagshúsið, sem
nú hýsir Hótel Horn, keypt. Svo var það selt aftur. Og nú er grunnskólinn aftur
sprunginn og fólk er farið að skoða að kaupa Oddfellowhúsið. Þetta hefur eflaust átt
rétt á sér á sínum tíma, þegar við vorum að berjast í bökkum og fást við fólksfækkun og
miklar sveiflur.

En nú erum við stækkandi samfélag og ég sé tækifæri til þess að hætta þessum
skammtímalausnum, að redda hlutum fyrir horn. Við þurfum bara að kaupa eða byggja
húsnæði sem dugar.

Aðgengið að Tanga var t.d. hrikalegt. Barn í hjólastól hefði ekki getað sótt sína þjónustu
þar. Það sem við þurfum er framtíðarhúsnæði sem hentar betur. Við viljum setja á fót
þriðja leikskólann hérna á Ísafirði og þá geta börnin verið í sínu umhverfi, sem þau hafa
vanist frá unga aldri, fram að grunnskólanum.

En þessir gámar sem núna stendur til að nota mega aldrei verða annað en
skammtímalausn. Við verðum að fara byggja. Það er okkar áhersla að nýtt
leikskólahúsnæði þurfi að vera í forgangi, af því við viljum ekki þurfa að nota þessar
skammtímaeiningar endalaust.

SAMSTAÐA OG SAMHELDNI

Nú eru almenningssamgöngur milli byggðakjarna innan sveitarfélagsins síst til
fyrirmyndar. Hafið þið einhverja framtíðarsýn í þessum efnum? Hvernig mynduð
þið vilja að ástandið væri?

Við viljum auka tíðni ferða í alla kjarna. Bæði innan Skutulsfjarðar, út í Hnífsdal og inn í
hverfi, en líka á Suðureyri, Flateyri og Þingeyri.

Þetta hefur mikið verið rætt í öllum þeim samtölum sem við höfum átt núna í
kosningabaráttunni og maður hefur ekki rekist á einn aðila sem er sáttur. Þú veist, það
er engum sem finnst þetta ganga eins og þetta er eða virka.
Núna eru 30 ár síðan við sameinuðumst í Ísafjarðarbæ, en við erum samt aðskilin. Ég
held að með bættum almenningssamgöngum, þegar fólk finnur að það geti skroppið í
strætó og farið í búð út á Ísafirði og samt verið komið heim fyrir kvöldmat, þá breytist
upplifunin þess. Þannig getum við aukið samstöðu og samheldni innan sveitarfélagsins.

Sömuleiðis hvað varðar krakkana, eins og ég nefndi áðan, þá getum við aukið aðgengi
að tómstundastarfi og nýtingu á íþróttahúsunum okkar og sundlaugum. Og talandi um
þær, þá langar okkur að prófa að opna sundlaugarnar lengur, þannig þær gætu orðið
samkomustaður fyrir ungt fólk.

En við þurfum að skoða almenningssamgöngur innan Ísafjarðarbæjar alvarlega, strax
við upphaf nýs kjörtímabils, og gera það í hlýju samtali við þau sem eru að fara nota
þær. Við þurfum að tala við menntaskólanemana okkar, við unglingana, við alla þá sem
stunda íþróttir og setja saman einhverja mynd sem virkar.

FLUGMÁL: STÓRT SKREF TIL BAKA

Hvaða möguleika hefur bæjarstjórn til þess að stuðla að nýjum
almenningssamgöngum til og frá norðanverðum Vestfjörðum ef áætlunarflug
leggst af? Sérðu möguleika á ferðum áætlunarbíla eða jafnvel strandsiglingum?

Sko, ég er ekki komin svo langt að fara að hugsa plan B frá flugsamgöngunum, en við
þurfum auðvitað að bjóða upp á rútuferðirnar. Ég meina, það fer Strætó frá Reykjavík
og norður á Akureyri og, þú veist, það munar um það að hafa þennan möguleika. En
sömuleiðis þá þarf maður náttúrulega að tryggja vetrarþjónustu og færð.

Þessi skerðing á þjónustu sem varð með nýjum samningi Vegagerðarinnar við
Icelandair finnst okkur vera stórt skref til baka. Þeir sem eru mest að nota flugið, ég
meina þetta er fólk sem er að fljúga fyrir vinnu. Þetta eru fyrirtæki sem þurfa skyndilega
að senda starfsfólk til þess að sinna einhverjum verkefnum, kannski fólk sem þarf að
fara suður bara á einn fund, eða til að sækja sér heilbrigðisþjónustu og vill komast til
baka samdægurs.

Og mér finnst bara mikilvæg þjónusta við fólkið hérna að það sé hægt að fljúga helst
tvisvar á dag alla daga sko.

Við sjáum fyrir okkur að það verði skoðað af alvöru hvort möguleikar séu á öðrum
flugvallarstæðum í Ísafjarðarbæ, þannig við getum tryggt flugsamgöngur til frambúðar.
Við viljum vera sterkur málsvari fólksins hér, að við fáum þá þjónustu sem við þurfum.
Þetta er bara, já, ein af grunnstoðum þess að við getum búið hérna, að við getum sótt
þjónustuna okkar þegar það er búið að gera hana svona miðlæga.

SAMGANGUR, SAMEINING

En hvernig sérðu fyrir þér Vestfjarðagöngin? Eiga þau að vera einbreið bara?
Hvað er það?

Í guðanna bænum, þau þurfa að vera tvíbreið. Það er bara svipað og
flugsamgöngurnar, það þarf bara að þrýsta á að það gerist sem fyrst. Við erum
náttúrulega að bæta samgöngurnar svo mikið á sunnanverðum Vestfjörðum og það er
ekki hægt að vera með flöskuháls hérna yfir á Ísafjörð.

Hver er afstaða þín og ykkar til sameiningar við nágrannasveitarfélög, til dæmis
Bolungarvíkurkaupstað og Súðavíkurhrepp?

Sko, þegar kemur að sameiningu, þá finnst mér ekki rétt að Ísafjarðarbær hafi
frumkvæðið að því. Eins og við vorum að tala um áðan, þá eru 30 ár frá síðustu
sameiningu. Og hún hefur nú ekki verið sú farsælasta í gegnum tíðina.

Þannig að ef að það verður frekari sameining, þá þarf skilyrðið að mínu mati að vera að
hún sé að frumkvæði minna sveitarfélagsins. Við þurfum svo í kjölfarið að skoða vel
hvort að við séum fær um að veita þessu sveitarfélagi þá þjónustu sem til þarf. Þú veist,
við getum ekki samþykkt að taka þau inn og tekið við útsvarinu þeirra og svo tekið af
þeim þá þjónustu sem þau hafa verið að reyna að halda úti hingað til.

Mér finnst mjög mikilvægt að upplifun íbúa sé ekki sú að verið sé að taka allt af þeim.
Að þeir verði hluti af heildinni. Ef við gætum tryggt að svo sé, þá myndi ég taka mjög
jákvætt í slíkar umleitanir. Það þarf að gera þetta almennilega.

Hvar er framtíðarsvæðið fyrir íbúðabyggð? Viltu þétta íbúðabyggð á Eyrinni eða
brjóta frekar nýtt land?

Það hefur ekki verið byggt neitt undanfarið, en það er búin að eiga sér stað rosalega
mikil undirbúningsvinna. Það er búið að teikna upp nýtt miðbæjarskipulag og þar er
búið að koma fyrir nokkrum lóðum sem við sjáum fyrir okkur að henti vel undir minni
fjölbýlishús — við viljum við reyna að koma leigufélögunum inn þar.

Það er svona ákveðin þétting, sem okkur finnst skynsamleg. Við viljum þó ekki byggja
þannig að fólk getir teygt sig inn um næsta glugga. Við verðum að passa upp á að vera
ekki að skyggja alveg á nærliggjandi hús. En hófsöm þétting finnst mér alveg mega
eiga sér stað á Eyrinni, við höfum bara takmarkað land.

En það er búið að teikna svo upp framhald af Tunguhverfinu, sem mér líst mjög vel á.
Þess vegna sjáum við líka fyrir okkur að það væri mjög jákvætt að byggja þriðja
leikskólann inni í firði. Það yrði væntanlega mikið af barnafólki þar.

Í framhaldi af því, þegar Tunguhverfið er allt uppbyggt, þá er Hauganesið næst á
dagskrá. Við erum mjög fylgjandi þessum áformum.

DJÚPA LAUGIN

Væri eftirsóknarvert að þínum dómi að stækka þjóðgarða eða friðlönd á svæðinu?
Eða ætti heldur að nýta þau til atvinnu og byggða ?

Mitt álit í öllum umhverfismálum er kannski að við þurfum að passa upp á að við getum
haldið samfélaginu hérna gangandi. Ég er til dæmis mjög jákvæð gagnvart virkjunum,
því ég veit að við þurfum þær. Það þýðir ekki að ég sé mótfallinn friðlandi eða stækkun
þjóðgarða. Það þarf bara að nálgast þessi mál af skynsemi, það þarf að vanda sig.

En ég verð að viðurkenna að ég hef ekki sett mig nægjanlega inn í þessi mál enn sem
komið er. Það er allskonar sem ég á eftir að koma mér betur inn í og það mun ég gera.

Þú ert aldeilis að hoppa í djúpu laugina. Er þetta búið að vera erfitt?

Nei, þetta hefur verið skemmtilegt og fróðlegt. Maður er bara hreinskilinn með það sem
að maður þekkir ekki. Fólk tekur bara ágætlega í það og skilur vel að það taki smá tíma
að koma sér inn í málin.

Hvernig mætti fegra bæinn?

Fyrsta skref er náttúrulega að hefja vinnu við að halda við gangstéttunum okkar og
eignum bæjarins. Það þarf að gera átak í viðhaldi, sinna eignum okkar og gera það
almennilega áður en við förum að taka næstu skref.

ÁBYRGÐ OG ATVINNULÍF

Hver er þín afstaða til fiskeldis?

Eldið er að skapa flott störf og það er eiginlega ekki hægt að neita því að þetta er stór
liður í þeirri uppbyggingu sem hefur átt sér stað undanfarin ár og náttúrulega með þeim
starfsmönnum sem koma inn fyrir þessi fyrirtæki, þá erum við að fá oftast maka með
sem að nýtast annars staðar í samfélaginu okkar.

Hvað það varðar er ég bara mjög jákvæð. En varðandi umhverfisáhrifin, þá heyrir maður
alltaf bara þessa tvo póla. Það þarf auðvitað að vera strangt eftirlit með þessari
starfsemi og tryggja bæði velferð fisksins og svo umhverfisins. Þetta þarf að nálgast af
eins mikilli ábyrgð og hægt er. Við verðum að gera treyst því að verið sé að vinna innan
ramma laganna og að fólk sem starfar við þetta sé að gera sitt besta.

Hver er þín afstaða til uppbyggingar í ferðaþjónustu, t.d. varðandi skipakomur og
slíkt?

Ég er ein af þeim sem var rosalega neikvæð þegar túristaflóðið byrjaði að koma með
skemmtiferðaskipunum á sínum tíma. Núna þykir mér hins vegar rosalega gaman þegar
bærinn fyllist. Ég bý reyndar ekki á Eyrinni, þar sem að fólk gengur á gluggana. Maður
skilur að fólk sem verður fyrir því ergist.

Það eru náttúrulega takmörk fyrir því hversu mörgum við getum tekið við og það þarf
áframhaldandi samstarf á milli íbúa, sveitarfélagsins og rekstraraðila til þess að passa
upp á að þau séu virt.

Hvað varðar aðra ferðamenn, þá finnst mér hreinlega mega vera meira af þeim. Það er
synd og skömm að fólk sé að sneiða framhjá Vestfjarðakjálkanum í ferðalögum sínum
um landið. Við þurfum að vera aðgengilegri og líka sinna uppbyggingu sem gerir
svæðið eftirsóknarvert til heimsókna.

Hvað finnst þér um kláfinn og það mál allt?

Svona verkefni þarf að nálgast af rosalega mikilli ábyrgð. Það verður að eiga gott
samtal við íbúana þarna á svæðinu. Það er til dæmis mikið af börnum þarna, þannig
fólk hefur skiljanlega áhyggjur af mikilli rútuumferð á þessum slóðum.

Eins þarf að vera á hreinu hvað verður um mannvirkin ef þau hætta að standa undir sér
rekstrarlega. Ef fyrirtækið fer á hausinn, hver á að viðhalda þessu og koma í veg fyrir
umhverfisslys? Þar þurfa að vera skýrar línur.

En þetta er rosalega skemmtileg hugmynd, þó ég hafi reyndar efasemdir um
staðsetninguna.

HÆKKUM MENNINGARSTYRKI
Tölum aðeins um íþrótta- og menningarmál. Nú eru kjarnaviðburðir eins og Aldrei
fór ég suður, Við djúpið. og Act Alone að skila miklu til samfélagsins, bæði í
peningum og eins kynningarlega séð. Kemur til greina að efla starfsemi í kringum
þetta enn frekar? Nú þótti gott þegar bærinn fór að styrkja Aldrei, til dæmis.

Algjörlega, við erum mjög fylgjandi því. Þessar hátíðir og samstarf listamanna á hinum
ýmsu vettvöngum hefur styrkt samfélagið svo um munar. Okkur langar til að
endurskoða þessa styrki, bæði sem við erum að veita viðburðum og eins til listamanna,
og sjá hvort við getum ekki hækkað þá. Okkur finnst þeir kannski ekki hafa fylgt
verðlagi nógu vel og séu ekki að skila því sem þeir ættu að gera.

Listamönnum finnst gott að vera hérna, þeir finna ákveðinn stuðning í umhverfinu og
við viljum gera enn betur í að móta hér eftirsóknarverðan stað til að skapa list og njóta
hennar.

Þú sérð það sem sagt sem hlutverk bæjarins að styðja við og efla svona
starfsemi?

Já, svo sannarlega.

Hefurðu eitthvað að segja um samstarf bæjarins við Edinborgarhúsið?

Við fengum einmitt kynningu á stefnunni hjá Edinborgarhúsinu um daginn. Það er
virkilega flott stefna sem hefur verið unnin þarna fyrir húsið og skemmtileg framtíðarsýn,
sem að maður vill ýta undir að verði að veruleika. Við sjáum fyrir okkur að standa með
þeim í því að koma á þríhliða samningi.

Hafið þið einhverjar hugmyndir um hvað hægt sé að gera fyrir unga fólkið hérna,
svona aldurinn 16-25?

Þau í Edinborgarhúsinu sjá alveg möguleika á að auka hérna dagskrá fyrir þennan
aldurshóp, sem er svolítið að lenda á milli núna.

Að auki langar okkur mikið til þess að auka fjölbreytni í möguleikum fyrir ungt fólk. Til
dæmis að auka opnunartímann í sundlaugunum, auka aðgengið að íþróttunum og
öðrum tómstundum. Þar spila áðurnefndar almenningssamgöngur sterkt inn í.

Svo spurning að skoða hvort að það þurfi hérna ungmennahús, þar sem þau hafa
svolítið meiri yfirráð sjálf. Okkur langar semsagt til þess að auka fjölbreytnina en
auðvitað í samtali við umræddan aldurshóp.

ENGAR STÓRAR FRAMKVÆMDIR
Þarf að setja meiri pening í fótbolta?

Þau eru búin að vera að auka við sig og eru að standa sig mjög vel í fótboltanum. Þarf
fótboltinn meiri stuðning en eitthvað annað? Það er eitthvað sem ég er ekki alveg
komin inn í. Fótboltanum má telja til tekna, að þau eru mjög skýr með sína framtíðarsýn.

Eins og ég sagði þá eru engar stórar framkvæmdir í kortunum á næsta kjörtímabili, en
við viljum auðvitað gera það sem við getum til að viðhalda og efla það sem er þegar til
staðar.

Koma einhvern tímann nýjar skíðalyftur?

Guð. Heyrðu, er það ekki svolítið nauðsynlegt? Voru þær ekki svolítið mikið bilaðar í
vetur? Þetta er eitt af þessum málum sem ég þarf að koma mér betur inn í sko.

STYRKUR NÝLIÐANS

Nú þarf ég aðeins að pása, mér finnst svo frískandi að tala við þig. Allir hinir
oddvitarnir eru svo maríneraðir í bæjarmálunum, þú veist, búnir að vera glóðvolgir
í kerfinu í mörg ár og með öll mál á takteinum og öll svör á reiðum höndum. En þá
verð ég að spyrja, því þú ert að koma inn í þetta svona ný og fersk: Heldurðu að
það sé kostur fyrir þig, eða gæti það komið að sök? Ert þú kannski að koma auga
á hluti sem aðrir sjá ekki?

Ég upplifi þetta sem styrk. Mér finnst ég kannski vera að tala fyrir annan hóp, hóp sem
hefur ekki verið með málsvara hingað til í bæjarstjórn. En sömuleiðis er ég náttúrulega
tilbúin að tala við alla og starfa með öllum og bara komast að niðurstöðu. Ég er alveg
þjálfuð í því líka. Þó að ég hafi ekki verið í bæjarstjórn áður, þá hefur maður alveg verið í
starfi þar sem fólk er ósammála.

Hvaða hópur er það sem þú vilt koma og tala fyrir? Sem hefur ekki átt sér
málsvara?

Mín upplifun — og hún þarf ekki að vera rétt — en hún er sú að fólk sem hefur setið hér
í bæjarstjórn hafi ekki endilega þurft að líða skort á sinni lífsleið. Í gegnum störf mín í
verkalýðshreyfingunni hef ég barist fyrir þeim sem eru neðst í samfélaginu. Og eins fyrir
unga fólkinu, sem er að reyna að komast af stað en getur ekki. Þannig að ég hef
kannski skýrustu sýnina fyrir þá hópa og það eru þeir hópar sem mér finnst vanta
málsvara í sveitarfélaginu.

Þú lítur kannski málin ferskum augum?
Já ég vona það. Auðvitað getur alveg verið að fólk upplifi að þetta sé mjög neikvætt. Ég
meina, núna erum við Helgi bæði að koma ný inn, í fyrstu tveim sætunum. Ég vona þó
að fólk sjái þessar jákvæðu hliðar og hvað við höfum fram að færa.

HNÍFSDALUR ER VÍÐA

Hlutverk bæjarstjóra, hvernig sérðu það og hvað eruð þið að spá í með
bæjarstjóraefni?

Hlutverk bæjarstjóra er náttúrulega bara framkvæmdastjórnin. Hann þarf að framfylgja
ákvörðunum bæjarstjórnar innan þess ramma sem honum er gefinn og virkar sem
tenging bæjarstjórnar við stjórnsýsluna. Og auðvitað íbúana.

Sigríður Júlía, núverandi bæjarstjóri, hefur staðið sig virkilega vel og við erum ánægð
með hennar störf. Hún hefur líka tekið þátt í þessari vinnu sem átt hefur sér stað,
ferlagreiningu og slíku og það væri mjög jákvætt ef hún gæti fylgt henni eftir. Við sjáum
því rosalega mikinn kost í því að halda henni í starfinu. Hún er okkar fyrsti kostur.

Hvar greinir á milli ykkar og hinna flokkanna? Hvað hefur Samfylkingin fram að
færa hér í þessum tilteknu kosningum sem aðrir flokkar hafa ekki?

Öll framboðin vilja að miklu leyti gera sömu hlutina að mér sýnist. En á mismunandi
hátt. Auðvitað er munur á einhverjum stefnumálum, sumir vilja t.d. stækka leikskólana
meðan við erum þvert á því að það sé gert.

Ef þú horfir á vinstri-hægri kvarðann, þá erum við eini flokkurinn sem er vinstra megin
við miðju í þetta sinn. Okkar áhersla er á fólkið, það eru fjölskyldurnar og það eru
íbúarnir. Þannig að fólk getur treyst á að þegar þarf að taka ákvarðanir, þá munum við
setja hagsmuni íbúanna framar öllu.

Segjum sem svo að þið séuð í aðstöðu til þess að mynda bæjarstjórn að loknum
kosningum? Eru einhverjir flokkar á óskalistanum? Eru einhverjir flokkar sem þið
viljið ekki starfa með?

Miðað við stefnurnar, þá sjáum við svona minnsta samstarfsgrundvöllinn með
Miðflokknum. En að öðru leyti þá held ég að við gætum alveg starfað með öllum hinum,
á meðan að þau væru tilbúin í samtalið. Þannig að við útilokum engan.

Gylfa í Viðreisn langar svo mikið að vera bæjarstjóri. Mynduð þið vilja leyfa honum
það, ef þið færuð saman í stjórn?
Það væri náttúrulega bara til umræðu. Við höfum bara ekkert á móti Gylfa eða hans
persónu og það er margt sem hann stendur sig mjög vel í. Þannig að ég sé ekkert sem
útilokar það, nei.

Að lokum. Nú ert þú Hnífsdælingur, Jónas apótekari er Hnífsdælingur, Kristján
Kristjáns er Hnífsdælingur. Af hverju eru svona margir Hnífsdælingar að reyna að
taka yfir Ísafjörð? Eru þetta samantekin ráð?

Hnífsdalur er náttúrulega bara bestur.