[Við hefjum upptöku í miðju spjalli]... Ég undirbjó mig meðal annars með því að
lesa viðtölin sem ég tók við oddvitana hérna árið 2002, þegar allt var í hassi á
Vestfjörðum. Nú eru aðeins öðruvísi tímar. Það er kannski óhætt að segja að við
höfum verið að upplifa ákveðið góðæri hér á Ísafirði kannski síðustu fimm, tíu
árin…

Ég myndi halda það, með smá brekku bara rétt í kringum Covid, sem var svo sem alls
staðar. En eigum við ekki að segja að síðan 2018 hafi verið stígandi í mannfjölda, nýjum
fyrirtækjum, nýjum atvinnugreinum.

Ég held að það sé óhætt að segja að við séum á betri stað en við höfum oft verið áður,
Vestfirðir í heild og norðursvæðið líka. Það kemur líka með bættum samgöngum og
öðru slíku, þó við séum ennþá pínu eftir á hvað það varðar. Þetta er ekki alveg komið.

Nema hvað. Hver ert þú eiginlega?

Ég heiti Kristján Þór Kristjánsson og ég er Hnífsdælingur. Er alinn upp í Hnífsdal og bý
þar til tvítugs, þegar ég fer suður í háskóla og klára þar rekstrarfræði úr Tækniskólanum
og fer svo að vinna hjá Búr og beið þangað til konan mín, Salóme Elín Ingólfsdóttir,
útskrifaðist úr sínu námi. Við fluttum svo aftur vestur árið 2005. Síðan þá erum við bara
búin að koma okkur vel fyrir hérna, búin að sinna hinum ýmsu störfum og við eigum
fjögur börn, sem eru reyndar ekki börn lengur, í árum talið.

Svo hef ég verið að sinna hinum ýmiss konar félagsstörfum, aðallega í kringum
knattspyrnu. Var í tíu ár formaður yngri flokka Vestra og losnaði svo úr því djobbi. Þá
var dóttir mín elsta komin upp úr því. Hana langaði að halda áfram í fótbolta og ég
þurfti að setja á laggirnar fyrir hana og vinkonur hennar og fleiri stelpur hér í bænum
meistaraflokk kvenna. Ég er þar formaður í dag og reyni að reka það fyrir stelpurnar og
hjálpa þeim með það verkefni.

PLATAÐUR Í PÓLITÍK

Hvernig stendur á því að þú vilt vera skipta þér af pólitík?

Ég var nú eiginlega bara plataður í þetta, en ég hef alltaf haft miklar skoðanir og var oft
að básúna þær hingað og þangað.
Svo er það þannig að besta vinkona mín er af Góustaðaættinni, sem er mikil
Framsóknarætt eins og þekkt er. Einhvern veginn verður það að frændi hennar, Gauti
Geirsson, fer að fylgjast með mér og því sem ég er að segja. Honum leist greinilega á,
þannig hann ákveður plata mig inn í framboð fyrir hönd Framsóknar árið 2018. Býður
mér þá að taka þriðja sætið, þannig að ég gæti farið rólega inn í þetta. En svo flytur sú
sem var í öðru sæti og ég dett þá upp í annað sætið rétt fyrir kosningar og bara inn í
bæjarstjórn. Þannig að ég dett eiginlega óvart beint inn í bæjarstjórn.

En afskipti mín af stjórnmálum hér eru nú eiginlega bara af einlægum áhuga mínum á
sveitarfélaginu okkar. Ég held að við búum í einstaklega góðu samfélagi og ætli ég sé
ekki að reyna að láta gott af mér leiða. Mætti orða það þannig.

Þannig að þú hoppar bara beint í djúpu laugina?

Já, ég dett bara beint í djúpu laugina — og inn í frekar róstusamt kjörtímabil. Í raun
fannst mér eftir það kjörtímabil að það væri kjörið að hætta bara, ljúka ferlinum með því
sama.

Þetta var erfitt fyrsta kjörtímabil. Það gekk allskonar á. Það var Covid og það var voru
erfið bæjarstjóraskipti, það var margt erfitt við þetta. Samstarfið gekk ekkert
sérstaklega vel milli minnihluta og meirihluta og þar fram eftir götunum…

Þannig það var kannski borðleggjandi að segja þetta gott bara. En mér fannst asnalegt
að hætta á þessum nótum. Það hefði truflað mig. Mig langaði að fara aftur og gera
þetta öðruvísi — ég hreinlega trúði ekki öðru en að það væri hægt að gera þetta betur. Í
meiri sátt og samlyndi. Með betri samvinnu.

GOTT KJÖRTÍMABIL AÐ BAKI

Finnst þér það hafa tekist núna?

Algjörlega. Bara 100%. Auðvitað skiptir þetta líka öllu máli hvernig þú ferð inn í verkefni.
Konan mín spurði hvort ég væri ruglaður þegar ég sagðist vilja fara aftur fyrir síðasta
kjörtímabil. Það tók á. Var ýmislegt erfitt við það. Á móti kemur að þetta kjörtímabil sem
nú er að ljúka hefur verið einstaklega gott.

Við höfum náð að vinna mjög vel saman. Við höfum ekkert verið sammála um allt, en
höfum reynt að koma okkur saman um niðurstöður. Ég held að það sé samfélaginu og
sveitarfélaginu til góðs að reyna að koma verkum áfram í samvinnu heldur en að
argaþrasast með þau í einhverja mánuði. Það er mín staðfasta trú að það sé betra að
reyna að vinna hluti saman. Svo lengi sem það pólitískur sé vilji og við getum talað
okkur saman.

Auðvitað eru verkefni sem við erum pólitískt erfið. En það var mjög gott þetta
kjörtímabil, að vinna með því fólki sem var þá í bæjarstjórn.

Hverskonar verkefni eru „pólitískt erfið“?

Það reyndi raunar ekki á það á síðasta kjörtímabili. En þú getur ímyndað þér, ef til stæði
að koma á einkareknum leikskóla t.d., þá munu vinstri og hægri öfl sennilega ekki vera
sammála. Þá er ég að meina svoleiðis verkefni sem við þurftum eiginlega ekki að taka á
þessu kjörtímabili. Sú pólitík vegur auðvitað þyngra þegar kemur að landsmálunum, en
við vorum allavega blessunarlega laus við svoleiðis átök á síðasta kjörtímabili.

Hverjir telur þú að séu kostir Ísafjarðarbæjar til búsetu, lífs og starfa?

Ef ég tala við eigin reynslu þá er ofsalega gott að ala upp börn hérna. Það er gott
íþróttastarf hérna, mjög fjölbreytt og góð íþróttafélög.

Svo er það bara fólkið og styttri vegalengdir! Ég held að fólk í borginni myndi ekki trúa
því. Ég get farið heim eftir vinnu og ég get verið kominn á fimm mínútum á skíði, golf
eða í fjallgöngu. Þetta eru ótrúleg gæði að þurfa ekki að sitja í umferð heilu og hálfu
dagana. Ótrúleg lífsgæði.

NÝSKÖPUNARBÆR

Þegar þú lítur á 21. öldina í Ísafjarðarbæ, í stuttu máli geturðu nefnt hvar hefur
verið vel gert á öldinni og hvar finnst þér það hafa brugðið út af?

Ég held að atvinnulífið sé orðið fjölbreyttara á þessum árum og það hefur verið mikil
gróska. Ísafjarðarbær hefur svo sem alltaf verið hálfgerður nýsköpunarbær. Má þar
nefna 3X, Kerecis, PÓLS og allt þetta. Í raun ættum við kannski að gera meira af því að
ýta undir nýsköpun og grósku, sem sannarlega er til staðar.

Undanfarin ár höfum við verið að sjá fólksfjölgun, aukningu í tekjum, meiri hagvöxt og
annað slíkt. Því fylgir að við teljum okkur geta gert meira í innviðum. Við erum ennþá í
innviðaskuld eftir hæg ár hérna fyrr á öldinni og því er mikilvægt að snúa við, þó svo
flest sveitarfélög séu nú alltaf í innviðaskuld varðandi marga hluti.

Það er svona líka bara meiri jákvæðni, held ég, hjá fólki yfir höfuð og bara landinu öllu.
Landsbyggðin og Vestfirðir eru svona farin að byggjast hægt og rólega upp og það er
orðin jákvæðni í þessu.
Ég held til dæmis að á næsta kjörtímabili eigum við eftir að sjá mikla uppbyggingu í
íbúðum og öðru slíku. Vonandi fylgir atvinnulífið með.

Tala nú ekki um að menningarlífið á Ísafirði hefur náttúrulega alltaf verið stórbrotið sko.
Tónlistarskólarnir hérna stórkostlegir og Litli leikklúbburinn hefur verið mjög öflugur
undanfarin ár, góð endurkoma þar. Ísafjarðarbær hefur oft verið kallaður íþrótta- og
menningarbær og ég held að sú nafngift sé vel verðskulduð..

Við höfum líka rosalega flottar listahátíðir, Aldrei fór ég suður, Act alone, svo mætti lengi
telja.

ÓSKALISTINN

Hverjar sérðu fyrir þér sem helstu áskoranir komandi ára og hvaða markmiðum
viltu hvað varðar t.d. leikskólamál, íþróttaaðstöðu og menningarlíf og svo
atvinnusköpun?

Ég er með langan óskalista . Ég held að númer eitt, tvö og þrjú verðum við að halda
áfram að vera fjárhagslega vel stæð. Við erum búin að koma okkur vel fyrir núna. Við
erum búin að lækka skuldir. Skuldastaða okkar er orðin mjög góð, þannig að við erum
farin að hafa tækifæri til að fjárfesta meira.

Stærstu áskoranir okkar á næstunni eru þessu tengdar þó. Það það er gaman að
bæjarbúum fjölgar, en en það kostar. Innviðir kosta. Í dag er grunnskólinn okkar
sprunginn. Við þurfum samkvæmt nýjustu tölum sex nýjar stofur miðað við hvernig
þetta verður næstu árin.

Þannig að ég tel helstu áskoranir okkar á komandi kjörtímabili verða að stækka
grunnskólann og leikskólana til að fylgja þessu eftir.

Varðandi íþróttamannvirki og annað slíkt eru þau líka að mörgu leyti sprungin. Ég myndi
vilja byrja á því að vilja skipuleggja Torfnessvæðið til framtíðar, svo við getum þá
kannski sett okkur grunnmarkmið varðandi hvað við getum gert á hverju ári og farið að
byggja þetta upp eftir þörfum og getu, smátt og smátt.

Það er ekki að fara gerast að við getum byggt upp grunnskóla, leikskóla,
knattspyrnuhús eða nýtt íþróttahús og stólalyftu á einu kjörtímabili. Það mun bara ekki
gerast og ég ætla ekki að fara að ljúga því að fólki.

Stærstu áskoranirnar núna eru held ég bara að reyna að skipuleggja til framtíðar og
taka vel á þessum skóla- og leikskólamálum og reyna að klára þau.
BROTNIR POTTAR

Hvort mynduð þið frekar leggja áherslu á sterkari þjónustu og starfsemi
sveitarfélagsins eða lægri gjöld?

Auðvitað væri svona diplómatasvar að reyna að nefna einhvern milliveg, en ég held að
sterk þjónusta við fyrirtæki og fólk eigi að vera númer eitt, tvö og þrjú.

Við eigum þá að nýta skattpeningana í það að fólk sé ánægt, við séum að moka, við
séum að gera við og viðhalda mannvirkjum bæjarins, séum að sinna umhverfinu og láta
bæinn líta vel út. Ég held að ég myndi velja það á undan, áður en ég færi að lækka
skatta mikið. Við höfum verið að lækka fasteignaskatta og annað slíkt, en ef ég þarf að
velja á milli þá myndi ég taka góða þjónustu og gott umhverfi og fallegan bæ á undan
því.

Hvaða áherslur hyggist þú og þið leggja í mannauðsmálum til að styrkja stöðu
bæjarins? Nú er til dæmis víða sagt að ýmsar deildir bæjarins séu undirmannaðar
og jafnvel sprungnar. Þarna mætti vísa í könnun sem birt var í vor, þar sem
skipulagssvið t.d. fékk ekki háa einkunn.

Já, það skoraði mjög lágt. Við erum meðvituð um þennan vanda og erum byrjuð að
bregðast við honum. Núverandi bæjarstjórn og bæjarstjóri og sviðsstjórar eru byrjaðir
að vinna eftir þjónustustefnu og nú erum við byrjuð að vinna að svona ferlagreiningu
innandyra, þar sem við ætlum að skilgreina okkar þjónustu alveg niður í ræmur og
hvernig við viljum þjónusta og svara og annað slíkt.

Þetta ferli er bara í gangi og mun vera í gangi þetta árið og þá sjáum við væntanlega
hvort við getum notað tæki og tól betur, eða hvort að mannauðurinn okkar getur nýtt
hann betur, áður en við förum í að fjölga starfsfólki. Ég held að þessi grunnvinna sé
mjög mikilvæg. Er einhvers staðar pottur brotinn? Getum við betur hjálpað hvert öðru?
Eru einhverjir ferlar ekki í lagi? og annað slíkt. Við ættum að kappkosta að klára þá
vinnu og nýta okkur þessa þjónustustefnu sem við settum okkur áður en lengra er
haldið

En svona miðað við umræðuna – er hægt að segja að þetta sé ásættanlegt
ástand?

Alls ekki. En þetta er ekkert endilega bara sveitarfélaginu að kenna. Þetta er að
einhverju leyti innandyra vandamál hjá okkur, þetta eru ferlar og annað slíkt en þetta er
líka, kerfið á Íslandi er mjög þungt. HMS [Húsnæðis- og mannvirkjastofnun] og
reglugerðarverkið á Íslandi er alveg ótrúlega flókið oft á tíðum.

Þannig að ástandið er svona sambland af þessu öllu. En miðað við tal mitt við fólk, þá
er víða pottur brotinn sem ætti að laga. Það er alveg rétt.

SÍMAFRÍ

Nú var mikil vinna lögð í að byggja upp faglegt starf í Tanga sem var töluverð
ánægja. Það var farið út í hana af einhverju sem taldist vera tilfinnanleg þörf.
Börnin voru ekki að blandast þegar komið var í grunnskólann. Eru lyktir þess máls
ásættanlegar? Er ekki afturför að halda aftur í sama farið?

Jú, ég held reyndar að það sé ekkert mál að hanna ferli þar sem börn ná að hittast á
milli tveggja leikskóla. Ég bara trúi því ekki að það sé ekki hægt að leysa það mál svo
vel sé.

Við lentum bara í ákveðnu vandamálum á Tanga. Við erum líka, því miður, í
starfsamannaskorti á leikskólunum. Eftir greiningar og samtöl við leikskólastjóra er talið
betra að reka tvær stærri einingar, þar sem auðveldara er að færa starfsfólk á milli
þegar upp koma veikindi eða annað slíkt. Þessi greining, ég keypti hana alveg og ég
held að það sé hreinlega betra að að reka tvo sterka leikskóla, þó reyndar þurfum við
að stækka þá, sennilega báða.

Ég er búinn að fara með fjögur börn í gegnum leikskóla, í báðum formum. Og ég var
mjög ánægður með báða kosti. Maður þekkir svo sem ekkert endilega á mörgum
stöðum á landinu að það sé sérstök fimm ára deild. Flestir bæir eru bara með leikskóla
upp í grunnskóla. En ég held að þetta sé eitthvað sem við þurfum að vanda okkur við
þegar við setjum þetta aftur niður í sama farið og það á ekki að vera mikið vandamál
bæði að stunda meira útinám og láta þessa krakka hittast. Ég treysti starfsfólki
leikskólanna til að gera það.

Takið þið afstöðu til símanotkunar í skólum?

Já. Við erum með það í okkar kosningabæklingi, við viljum svokallað símafrí í
grunnskóla, en þeirri niðurstöðu komumst við að eftir að hafa talað við börn á öllum
aldri, bæði núverandi grunnskólanema og svo krakka í menntaskólanum sem eru
nýbúin með grunnnámið.

Við teljum sem sagt að það sé kominn tími til að gera tilraunir með símalausan skóla
—símafrí, viljum við kalla það — og leyfa krökkunum að njóta skólagöngunnar
áreitislaust. Við vitum það öll að þetta tekur mikla athygli frá okkur. Ég er alveg sekur
um það, eins og flestir.

SAMFÉLAGSVERKEFNI

Kemur til greina að setja einhverja mælikvarða á starf grunnskólans? Samanber
könnunina Skólapúls sem var lögð af á sínum tíma. Hvað vill Framsókn gera til að
fylgjast með mikilvægustu stofnunum samfélagsins?

Þetta er góð spurning. Við viljum klárlega taka þátt í mælikvörðum sem mæla
grunnskólana okkar miðað við aðra grunnskóla á landinu. Ég held að það sé bara gott
fyrir samfélagið, ég held að það sé gott fyrir kennara, ég held að það sé gott fyrir
skólastjórnendur og ég held að það sé gott fyrir nemendur að við berum okkur saman.
Ef við berum okkur ekki saman við neinn þá vitum við í rauninni ekki hvar við stöndum.

Þær leiðir sem okkar menntastofnanir og menntamálaráðuneytið vilja fara, ég held við
myndum vilja taka þátt í því. Hvort sem það eru samræmd próf eða Skólapúls eða
annað, þá held ég að það sé mjög nauðsynlegt að við séum vakandi fyrir því hvernig
skólastarfið er og að við berum okkur saman við aðra grunnskóla á landinu. Þannig að
ég held að við ættum að gera það, taka þátt í því hvernig sem það er. En það er þó
mikilvægt að það sé gert í öðrum skólum, því annars getum við ekki borið okkur saman
um það.

Hver er fyrirhuguð stefna í málefnum grunnskólans? Nú er víst árangur
grunnskólans á Ísafirði í PISA-könnunum lélegur miðað við landsmeðaltal. Er það
ásættanlegt?

Það er ekki ásættanlegt. Skólarnir okkar, kennararnir okkar og skólastjórnendur, held ég
að vilji allir að við skorum hærra. Ég held að það sé enginn sáttur við það að við séum
að skora neðarlega á PISA-könnunum.

Þetta er einfaldlega verkefni sem allt samfélagið þarf að taka þátt í. Skólarnir og
kennararnir þurfa að taka af skarið, en við foreldrar verðum að hjálpa til. Það er bara
þannig, það lærir enginn krakki að lesa bara í skólanum. Ég held að þetta sé
samfélagslegt verkefni sem við þurfum bara virkilega að taka okkur á í þessum bæ. Að
vinna með skólanum og kennurunum og hjálpa börnunum okkar að ná árangri, hvort
sem það er heima fyrir eða í skólanum.

Okkar verkefni næsta kjörtímabil er að fara strax af stað með að virkja nýja
menntastefnu, sem verið var samþykkja. Funda með skólastjórnendum og kennurum
og foreldrum og skilja hvernig við getum gert þetta. Hvernig við fáum samfélagið í heild
til þess að ná betri árangri.

SAMGÖNGUR, SAMGANGUR

Nú vil ég spyrja um almennings-samgöngur milli kjarnabyggðanna hér í bæ,
Ísafjarðar, Þingeyrar, Suðureyrar og Flateyrar. Þær gætu verið miklu, miklu öflugri,
sem aftur myndi auka samheldni og samstöðu innan sveitarfélagsins. Hafið þið
einhverja framtíðarsýn í þessum málum? Nú voru t.d. gerðar tilraunir með
niðurgreiddan leigubílaakstur milli Flateyrar og Ísafjarðar, ef ég man rétt…

Það var gerð tilraun á Flateyri. Við fengum styrk í það verkefni með Vestfjarðastofu að
vera með svona samkeyrslubíla, þar sem fólk gat krunkað sig saman og pantað bíla
þegar á þurfti. Það verkefni fór ágætlega af stað, en það voru þó brotalamir á. Og það
er leiðinlegt að það hafi ekki verið reynt að lagfæra þær, til þess að geta halda því
áfram.

En við eigum altént niðurstöður úr þessu verkefni til að byggja á. Það er alveg spurning
hvort við eigum að fara af stað með það aftur.

Nema hvað. Við þurfum nauðsynlega að finna leiðir til þess að bæta samgöngur milli
byggðakjarna og við höfum verið að horfa mikið til skólakrakka og krakka í íþrótta- og
tómstundum sem eru á fjörðunum geti komist hingað.

Hvaða möguleika hefur bæjarstjórnin að stuðla að nýjum almenningssamgöngum
til og frá norðanverðum Vestfjörðum ef áætlunarflug leggst af? Sérðu möguleika á
ferðum áætlunarbíla eða jafnvel strandsiglingum?

Ég held að enginn Íslendingur í dag hafi þolinmæði í strandsiglingar. Ég held að það sé
útilokað. Þó að það væri alveg krúttlegt að sigla en ég sé ekki fyrir mér ef maður ætlaði
að skreppa til London að maður myndi nenna að sigla í tvo, þrjá daga áður. Ég held að
það sé vonlaust.

Mér finnst þetta hreinlega vera á ríkinu. Ég ætla bara að segja alveg eins og er. Mér
finnst bara að ríkið og ég held að Vestfirðir greiði nógu mikið af skattpeningum og við
séum alveg búin að safna nóg fyrir ríkið. Þeir skulda okkur það að hafa almennilegar
almenningssamgöngur hingað.

Ég hef saknað þess í mörg ár að Strætó til dæmis fari aldrei til Ísafjarðarbæjar .
Sérstaklega yfir sumarið. Það er fullt af túristum sem myndu nota þessar ferðir. Ég held
að það sé krafa okkar að byrja á því að fá þá til að taka þátt í því núna þegar ný brú
verður komin í Gufufjörðinn og Dynjandisheiðin klár. Þá erum við komin á sama
kílómetrafjölda og til Akureyrar. Af hverju ættum við þá ekki að fá strætó eins og
Akureyringar? Ég held að það sé krafa sem við eigum að byrja á.

Innanlandsflug á svo ríkið bara að tryggja til okkar. Og við munum vera hörð á því. Og
mér finnst þurfa að bæta í þennan núverandi samning sem var gerður. Ég er ekkert
endilega sáttur við hann.

En ríkið á bara að tryggja þetta. Því miður hefur ríkið verið að draga úr
almenningssamgöngum á landsbyggðinni, færa peningana á höfuðborgarsvæðið
síðasta árið. Þetta er algjört baráttumál fyrir okkur.

Þarna setja menn fótinn niður. Hvernig var stemmningin niðri í Stjórnsýsluhúsi
þegar allt þetta flughavarí byrjaði?

Hún var nú ekkert sérstök en við náttúrulega hringdum út um allt. Það var verið að ýta
og pota í öllum flokkum og alls staðar. Næjarstjórnin sendi erindi bæði á Vegagerðina
og ríkisstjórnina varðandi þetta.

Eftirá að hyggja er ég ósáttur við að ríkið skyldi ekki hafa boðið flugið út í stærri pakka.
Að Ísafjörður, Hornafjörður, Húsavík, Vestmannaeyjar og fleiri staðir hafi verið ekki
boðnir út sem einn pakki. Ég held að fleiri aðilar hefðu haft möguleika á að bjóða í þetta
heldur en bara eitt fyrirtæki.

OKKAR FRUMKVÆÐI

Hver er þín og ykkar afstaða til sameiningar við nágrannasveitarfélögin?

Ég hef alltaf sagt að mér finnst að sveitarfélögin hér við Djúp eigi að sameinast í eitt. En
ég hef líka alltaf verið á móti því og var á móti því—líka innan Framsóknarflokksins,
þegar hann var með frumvarp á Alþingi—að knýja sveitarfélög eða neyða þau til að
sameinast. Þetta þarf að gerast að okkar frumkvæði.

Þessar hugmyndir hafa því miður ekki hlotið brautargengi, sérstaklega í
nágrannasveitarfélögunum. Við sem erum í þessari pólitík skuldum okkar íbúum að það
sé gerð konkret greining á þessu. Hverjir eru kostir og gallar sameiningar? Hvað
græðum við á henni og hverju töpum við?

Þannig gætu íbúar farið að taka afstöðu byggða á staðreyndum, en ekki bara
tilfinningum eins og við gerum í dag.
Þetta er það sem ég hef viljað gera, en hefur ekki hlotið brautargengi. Ég vil byrja á
þessu, gera almennilega SVÓT-greiningu fyrir íbúa og sýna þeim hvað við gætum
sparað á þessu og hvað við gætum gert. Hvað getum við byggt fyrir þann pening? Við
þurfum að fá þetta upp á borðið.

En af hverju eru nágrannasveitarfélögin svona hikandi? Eru þau uggandi yfir
örlögum þeirra sveitarfélaga sem sameinuðust Ísafjarðarkaupstað á sínum tíma?

Það er erfitt að segja til um það. Ég er ekkert endilega viss um að Flateyri, Þingeyri og
Suðureyri væru í betri málum í dag hefðu þau ekki sameinast Ísafjarðarkaupstað . Ég
hef ekki látið gera greiningu á því heldur. Ég held að það hefði verið þungt að reka þau
sveitarfélög stök.

Ég held að Ísafjarðarbær sé betri kostur, en það er greinilegt vantraust frá mörgum
stöðum innan sveitarfélagsins, sérstaklega Þingeyri eins og hefur sýnt sig í könnunum.
Þetta er bil sem næsta bæjarstjórn þarf að brúa betur. Það þarf að fara að hlusta betur
og skilja betur. Þarna er ákveðið vantraust. Það er horft til Ísafjarðar allt of mikið, sem
verður svona vondi kallinn í þessu. Það þarf að bæta það traust. Við þurfum að finna þá
leið, hvað það er sem upp á vantar.

HLUSTUM Á FÓLKIÐ

Hvað getur bærinn gert og hvað getur Ísafjarðarbær og stjórnsýslan gert til þess
að ná betur til Þingeyringa, Súgfirðinga og Flateyringa?

Ég held að við þurfum í fyrsta lagi bara að hlusta á þau. Fólk vill að það sé hlustað á
það. Þetta eru þessir litlu hlutir. Þetta eru draslið á víðavangi, þetta eru brotnar
gangstéttir og þar fram eftir götunum.

Ég held að það sé mjög auðvelt að leysa þetta að einhverju leyti í þorpunum með því að
búa til einhvers konar stöðu þar. Gæti verið blandað starf, sem skiptist milli stofnana.
Þetta gæti verið vigtarmaður á höfninni eða einhver tengdur íþróttahúsinu, sem yrði þá
líka einhvers konar dytta og dattari og gæti svolítið hugsað um þorpið.

Sá aðili gæti líka verið ákveðinn tengiliður við þorpin, til staðar til að hlusta og eiga
samtal.

Það er per se ágætis þjónusta í þorpunum ef þú horfir til stofnana. Það er sundlaug í
öllum þorpum, íþróttahús í öllum þorpum, grunnskóli og leikskóli í öllum þorpum. Að
undanskildum Hnífsdal. Sú þjónusta er góð að ég tel. Ég held að þetta sé aðallega
umhverfi og viðhald Það er leiðinlegt að glápa alltaf á sama draslið, sem þú ert kannski
búinn að kvarta yfir í sex ár og það kemur enginn að laga það. Fólk tekur það mjög inn
á sig, eðlilega. Ég er til dæmis oftar stoppaður út á götu ef það er loftlaus belgur heldur
en við vinnslu fjárhagsáætlunar.

FRAMTÍÐIN

Hvar er framtíðarsvæðið fyrir íbúðabyggð? Viltu þétta íbúðabyggð á Eyrinni eða
brjóta frekar nýtt land?

Við erum byrjuð að vinna að bæði. Það er í bígerð skipulag sem nær frá Ásgeirsbakka
og niður við Sindragötuna, fyrir framan Guðmundarbúð og hérna niður alla eyrina. Þar
sé ég fyrir mér lóðir sem væru hentugar til fjölbýlishúsa. Í misjöfnum stærðum. Þar
þurfum við að koma upp leiguhúsnæði, það vantar leiguhúsnæði. Gætum verið með
þess vegna óhagnaðardrifið leigufélag, þar sem að ungt fólk eða aðrir gætu verið.
Margir hafa óskað eftir 60 plús blokkum.

Þannig að ég sé fyrir mér svona fjölbýli á miklu leyti hérna á Eyrinni. Svo erum við alveg
að vera búin að klára 70-80 íbúða hverfi sem tekur við af Tunguhverfinu, fer lengra inn í
Tungudal. Það verður blönduð byggð af raðhúsum, parhúsum, einbýlishúsum og öðru
slíku. Þannig að ég held að við séum bara í ágætis málum. Við klárum fyrst
Tunguhverfið og svo brjótum við það land upp á nýtt bara í áföngum.

Þetta er svona framundan næstu 10-20 árin. Hverfi stækka og byggjast upp. Þannig að
það er bæði verið að þétta byggð og búa til ný hverfi.

Það vantar lóðir á Flateyri. Við erum búin að gera lóðir á Þingeyri sem eru lausar. Og
svo á Suðureyri þurfum við líka að skoða þetta. Þar til dæmis hefur oft verið nefnt,egar
maður talar við Súgfirðinga, gamli flugvöllurinn sem er byggð aðeins fyrir ofan. Þar gæti
bæði blönduð byggð, atvinnuhúsnæði og íbúðarhúsnæðI.

Hvert verður framtíðaratvinnusvæði Ísafjarðar þegar Suðurtangi er fullbyggður?

Þetta er ofboðslega erfið spurning . Við eigum atvinnusvæði inni á Skeiði, en ég held að
þegar Suðurtanginn er fullbyggður og við erum búin að þétta við hér, þá sé eina leiðin
að fara norður fyrir Eyri. Að halda áfram með Norðurbakkann svokallaða sem er kallaður
og hanna það svæði og halda garðinum alla leið út af Íshúsfélagi og inn í Krók.

Það er kannski bara einhver væmni, en mér finnst pollurinn fallegur og setja svolítið
svip á Ísafjörð. Ég veit ekki hvort ég myndi tíma að fylla hann upp. Ég held ég myndi
vilja byrja á að fara eitthvað norður fyrir fyrst. Og þegar það svæði er orðið fullt væri
gaman að fara inn við Funa með eitthvað atvinnusvæði, en það er reyndar
snjóflóðahættusvæði. Og eins og staðan er í dag hefur ríkið ekki viljað verja
atvinnusvæðið. Það verður möguleg breyting á því, ég veit það ekki. En ég sé fyrir mér
Norðurbakkann, að það sé næsta verkefni. En það eru einhver ár í það.

DRILL BABY, DRILL

Væri eftirsóknarvert að stækka þjóðgarða og/eða friðlönd á svæðinu? Eða ætti
heldur að nýta þau til atvinnu og byggðar?

Þjóðgarðar eru um margt góðir. Við höfum fengið góða viðkynningu t.d. af þjóðgarði á
Snæfellsnesi, Sá hefur gert gott fyrir túrisma. Það er mikil þjónusta í kringum þetta og
flott uppbygging sem á sér stað.

Það er bara spurning hvar við ætlum að setja friðland eða þjóðgarða. Það var mikil
umræða á kjörtímabilinu 2018-22 um að setja þjóðgarð í Dynjandisbót. Vinstri grænir
lögðu mikla áherslu á það á Alþingi og það voru margir fundir þar um.

Þessar hugmyndir strönduðu eiginlega á svörum ríkisins um að ekki væri hægt að lofa
vatnsaflsvirkjun neins staðar innan þjóðgarðs þegar slíkur væri kominn.

Staðan er sú að Vestfirðir eru langt á eftir í raforkumálum. Orkuskipti eru ekki séns á
Vestfjörðum eins og staðan er í dag. Við vorum ekki tilbúin í bæjarstjórn þá að
samþykkja þjóðgarð sem lokaði á alla möguleika á virkjunum á þessu svæði.

Að því sögðu held ég að svæðið í kringum Dynjanda henti vel fyrir þjóðgarð, því það
verður ekki mikið notað í öðrum atvinnurekstri en kannski túrisma.

Hvernig sérðu fyrir þér Vestfjarðagöngin? Eiga þau bara að vera einbreið eða
hvað?

Það er bara vonlaust dæmi. Vestfjarðagöngin eru týpískt dæmi að mínu mati um trú
ríkisstjórnarinnar á Vestfjörðum á þessum tíma. Ég held að þau hafi ekki haft neina von
um það að einhver myndi flytja hingað, meira heldur en var á þessum tíma. Þetta væri
alveg nóg og þau litu á þetta sem svona göng milli hverfa. Deyjandi hverfa.

Þetta var fáránlegt verk, því mér skilst að það hafi ekki kostað neitt mikið meira að gera
þetta almennilega. Og þetta verður okkar leið suður í framtíðinni. Hún er nú þegar 40
km styttri og það á eftir að brúa. Þannig að annað hvort verða að koma göng við
hliðina, eða við erum að fara að horfa á einhverja umferðarstýringu hérna á sumrin, þar
sem þú ert bara að bíða í 20 mínútur, hálftíma eftir slotti til að keyra.
Þetta er náttúrulega á áætlun hjá Vestfjarðastofu og hjá Fjórðungssambandinu í
gegnum okkur að þau eigi að vera hérna. Svo eru náttúrulega Álftafjarðargöng,
Vestfjarðagöng, Klettsháls, Hálfdán, Miklidalur öll í kortunum Einhvern tíma voru allt í
einu dottin inn göng undir Gemlufall, að ósk einhvers innan Alþingis. Svo örugglega vill
einhver göng um Dynjandisheiði, sem er 30 km langur fjallvegur.

VILLTA VESTRIÐ

Hvað finnst þér um fiskeldið?

Ég held að fiskeldi sé einhver stærsta orsök þess að okkur er að fjölga. Ég held að
fiskeldi hafi skilað þjóðarbúinu, Ísafjarðarbæ, Bolungarvík og Súðavík góðum tekjum og
einnig fleiri íbúum. Og ég er því fylgjandi fiskeldi, svo framarlega sem það eru góðar
reglur og þessu sé sinnt almennilega.

Það þurfa að vera skýrar reglur. Ég held að enginn vilji hleypa þessu bara í eitthvað villta
vestur, hvorki innan fyrirtækjanna né meðal íbúa. Ríkið ætti að gera meira af því að vera
með eftirlitsstörf hér vestan, sem eru allt of fá eins og er. Við eigum bara að gera þetta
vel, eins og fólk.

Þess vegna er nauðsynlegt að koma þessu frumvarpi í gegn sem er núna til umræðu.
Ég held að það sé gott fyrir okkur öll. Laxeldi er komið til með að vera hér.

Það hefur verið vöxtur í eldinu. Kerecis vegur auðvitað þungt. Og svo hjá
skemmtiferðaskipunum og túrisma almennt. Eru einhverjir vaxtarmöguleikar á
þessum sviðum? Ættum við að vera reyna laða að okkur einhvern nýjan iðnað?

Ég held við séum langt frá því að vera með nógu góða vetrarferðamennsku. Það er
vandamálið í ferðamannaiðnaði hér fyrir vestan. Ég myndi vilja fá Markaðsstofu
Vestfjarða og ferðaþjónustuaðila hérna á svæðinu til að vinna að þessu. Ég tala nú ekki
um þegar leiðin til okkar er farin að styttast, orðin svipað löng og til Akureyrar, þá
ættum við að geta einbeitt okkur meira að vetrarferðamennsku. Þar eigum við alveg
gríðarlega mikið inni.

Það þarf að tryggja vetrarþjónustu á vegum. Við hjá Ísafjarðarbæ ættum og erum nú
með áætlun núna um að fara að kaupa snjóframleiðslukerfi á skíðasvæðið, en við
þurfum meiri fyrirsjáanleika þar til að geta markaðssett skíðasvæðið almennilega. Það
er agalegt að horfa til þess að þegar er vetrarfrí til dæmis í Reykjavík, þá komast ekki
einu sinni allir á skíði sem fara frá höfuðborgarsvæðinu til Akureyrar.
Þannig að bærinn getur alveg unnið að þessu með þarfagreiningu að einhverju leyti og
hjálpað til við þetta. Ég held að stærsti vaxtarmöguleiki okkar í ferðamennsku sé
vetrarferðamennska.

Varðandi annan iðnað, þá er verkefni í bígerð sem við viljum styðja, sem er að setja á
stofn einskonar nýsköpunarmiðstöð, sem styður við ýmis verkefni með ráðum og dáð.

MENNINGARBÆR

Nú státar sveitarfélagið af flottum hátíðum eins og Aldrei fór ég suður, Við Djúpið
og Act Alone, sem skila miklu til samfélagsins, bæði í beinhörðum peningum og
eins hvað varðar kynningu og ímyndarsköpun út á við. Það vakti athygli og var
jákvætt að bærinn sá ástæðu til að lyfta undir með starfsemi Aldrei nýverið, en þá
spyr maður: er hægt að gera meira til að efla þetta fína starf?

Þessum viðburðum og þessari starfsemi fylgja ýmis jákvæð áhrif óbeint og má þar
nefna menningartengda ferðaþjónustu. Ísafjarðarbær er mikill og góður menningarbær.
Tónlistarskólarnir okkar t.d. hafa skila af sér mikið af tónlistarfólki sem hefur vakið
athygli jafnvel á heimsvísu. Virkilega flott fólk sem við eigum þar.

Við eigum að reyna að ýta undir menningarstarf og efla það eftir getu. Við höfum verið
að berjast fyrir því, að fá svona þríhliða samning fyrir Edinborgarhúsið sem við kæmum
að, sjálfseignarstofnunin Edinborg og svo ríkið. Þetta þekkist fyrir austan og fyrir
norðan, en við höfum einhvern veginn bara fengið tímabundna samninga. Ég held að
það myndi hjálpa okkur ef við gætum tryggt starfsemina með starfsfólki sem vill laða að
og gera menningartengda viðburði. Það er einn hlutur.

Svo höfum við verið að styðja við Kómedíuleikhúsið og þeirra góðu hátíð, Act alone.

Ég held að gróskan þurfi að byrja annars staðar heldur en hjá bæjarfulltrúum en við
eigum að hjálpa gróskunni að virka.

Segðu aðeins betur frá hugmyndum um þríhliða samning.

Við erum með samning við ríkið núna um Edinborgarhúsið, sem var gerður til tveggja
ára og er að renna út á þessu ári. Við viljum gera lengri samning, þar sem ríkið jafnar
framlög sveitarfélagsins, þannig að starfsemi hússins sé tryggð og hægt sé að ráða
starfsfólk til umsjónar. Svona stofnanir eru ekkert nema starfsfólkið.

Það þýðir ekkert að láta hús standa þarna og kalla það menningarhús, ef enginn er á
staðnum að vinna við að fá einhverja menningu inni í húsið og styðja við hana.
Okkur finnst borðleggjandi að ríkið komi að þessu, líkt og það gerir fyrir austan og í Hofi
á Akureyri. Þó við munum náttúrulega styðja við Edinborgarhúsið sama hvað öðru líður.
að það er stefnan að reyna að koma þessu á og sanngirnismál. Við höldum að við séum
í góðri samningsstöðu um að fá þennan samning góðan og reyna að tryggja
almennilegan rekstur Edinborgarhússins.

DJAMMIÐ?

Stendur ykkur hugur til að bæta aðstöðu ungmenna á svæðinu til félagsstarfs,
aldurinn 16-25 sem er stundum dálítið afskiptur?

Nú hefur Edinborgarhúsið nýverið sett saman mjög fína stefnu og inni í henni er góð
hugmynd sem mætti setja inn í samninga við bæinn t.d., en hún er sú að húsið gæti
sinnt einhverju hlutverki sem ungmennahús. Þar er t.d. pláss á efri hæðum sem mætti
nýta í rými fyrir hljómsveitir eða sem stað til að hittast, spjalla og spila. Mér sýnist það
vera kjörið tækifæri, enda þarf að gera eitthvað fyrir þennan aldurshóp.

En hvar á unga fólkið okkar að djamma? Mér heyrist það margt uggandi að
veitingarekstur í Edinborgarhúsinu mun breyta um form og þar verði ekki
ungæðingslegt næturlíf í kjölfarið.

Ungt fólk þarf djammstað. Tvítugir og eldri. Það er enginn bær án þess að unga fólkið
geti djammað saman. Ég er ekkert feiminn við að segja það. Hver heldurðu að vilji flytja
hingað ef það er ekki hægt að djamma annað slagið?

Ísafjarðarbær getur að sjálfsögðu ekki staðið í slíkum rekstri, en þörfin er svo
sannarlega til staðar og úr henni ætti ekki að gera lítið. Það verður að vera staður til að
djamma! Krakkar eru nógu mikið í símanum… hvert eiga þau að fara og hitta aðra
krakka? Þetta er bara hluti af því að vera ungur.

BOLTABÆR, SKÍÐABÆR

Hvernig er með fótboltann? Hyggist þið fjárfesta meira í honum á næstunni?

Það hefur mikið og gott starf verið unnið í fótboltanum hér. Nú sjáum við fram á að
völlurinn verði upphitaður á veturna og flóðlýstur, sem mun stórbæta aðstöðu til æfinga.
Vestri fjárfesti sjálfur í lögnum undir völlinn og nú er verið að koma upp varmadælu þar.

Það er ógeðslega erfitt að standa 15 ára úti í hríðarbyl og hagléli og æfa og auðvitað
dreymir mig, sem fótboltapabba og gömlum fótboltamanni, um að fá knattspyrnuhús
fyrir krakkana.
Næstu stóru fjárfestingar munu samt snúa að skólaeiningunum okkar

Við erum líka að fara að setja smá pening í skíðasvæðið, til að gera það virkt. Í sumar
verður byrjað að leggja lagnir í jörð og gera klárt fyrir snjóbyssur, sem verða staðsettar
víða. Í framhaldinu verður sett upp lyfta sem nær frá barnasvæðinu upp í Miðfell, svo þú
þurfir ekki alltaf að fara Sandfellslyftuna, sem er brött og erfið. Þá getum við haft opna
þessa brekku miklu lengur og oftar. Þetta er alls ekki dýr aðgerð, sem mun skila miklu
næstu fjögur árin.

Þarna tryggjum við opnun og tryggjum að fjölskyldur geti skíðað saman. Við erum líka
skíðabær, það má ekki gleyma því. Að geta rifið fjölskyldur og krakka úr símanum og út
og einhverja fjölskyldustund saman á skíðum held ég að sé bara gott fyrir bæjarfélagið
okkar.

Við vorum með miklu stærra plan sem við gerðum fyrir nokkrum árum, þar sem við
ætluðum að hækka skíðasvæðið og gera sameiginlegan skála og eitthvað. Svo þarf
maður stundum að gefa eftir með stærstu hugmyndirnar því maður á ekki peninga fyrir
þeim. En við höldum að við séum með gott plan núna til þess að geta starfrækt gott
skíðasvæði. Það þarf þó að snjóa aðeins, kannski fyrr en í mars.

KLÁFSMÁLIÐ

Hvar stendurðu með kláfinn?

Mér finnst kláfhugmyndin frá þessum einstaklingum ágæt.

Þetta er samt einkaframtak þeir sem brenna fyrir hugmyndinni verða að fá að ráða
henni. Ég hef samt þrjár efasemdir um þetta.

Það er umferð upp að kláf. Það er mjög þröngt bæði að fara yfir Hallabrekkuna,
Túngötuna og beygjuna við Hlíðarveginn.

Svo þarf að svara spurningum um hvernig hljóðvist og ljósvist verður. Mér finnst við
þurfa að fá konkret svör við þessu til þess að sé hægt að taka endanlega ákvörðun um
það hvernig ætli við gerum þetta.

En hvað verður um Gróanda?

Ég bara vil hjálpa Gróa að finna eitthvað flott og fínt svæði sem er vel aðgengilegt og
byggja þetta upp nýtt fyrir þau. Ég held að við ættum að láta fyrirtækið sem er að
byggja kláfinn hreinlega sinna því og þeir hafa lýst áhuga á því.
ALLTAF SAMTAL

Nú langar mig að spyrja þig aðeins um bæjarstjóra. Eruð þið með
bæjarstjóraefnið? Ætlar þú að verða bæjarstjóri?

Nei, ég er ekki bæjarstjóraefni. Við viljum finna bæjarstjóra sem hefur reynslu úr rekstri
sveitarfélags. Við teljum að það sé eiginlega nauðsynlegt að hann hafi rekið sveitarfélag
einhvern tíma áður, hvar sem er. Þetta er flókið og mikið apparat. Það tók mig heilt
kjörtímabil, eða eitt og hálft jafnvel, að komast inn í sem flesta hluti.

Þannig að ég held að það sé mjög mikilvægt að hann hafi reynslu úr sveitarfélagi og
rekstri þess, hvort sem það er stjórnarseta, bæjarstjórnarseta eða að vera sveitarstjóri
einhvers staðar á landinu. Og ég held að það ætti að vera rík krafa að hann gæti þá
komist fljótt inn í öll verk og fljótt inn í reksturinn.

Við viljum ekkert endilega auglýsa. Við gætum þess vegna hugsað okkur að finna
einhvern bæjarstjóra. En þetta verður svona alltaf bara samtal. Ég á ekki von á að við í
Framsókn fáum hreinan meirihluta, þó við séum alveg bjartsýnir á kosningu. En ég held
að þetta verði samtal. En við myndum vilja finna einhvern góðan bæjarstjóra.

Hvernig sérðu hlutverk bæjarstjóra fyrir þér?

Já, sko. Þetta er náttúrulega rosalega víðtækt starfg yfirleitt þegar menn eru að tala um
bæjarstjórn, þá verður alltaf að segja að bæjarstjórinn á að berjast fyrir hagsmunum
okkar Vestfirðinga gagnvart ríkisstjórninni, gagnvart Reykjavík og öllu því, sem er alveg
góðra gjalda vert. Pólitíkin gæti líka gert þetta og hefur oft betri tengingu inn á Alþingi í
svona hagsmunabaráttu.

Bæjarstjórinn þarf að mínu mati líka, ekki bara að vera drifkraftur sviðsstjóra,
forstöðumanna, starfsfólks í bænum. Hann á að stuðla að því að starfsfólki okkar líði
vel í vinnu. Að þau, vinni samkvæmt ferlum þannig að við gefum þá bestu mögulegu
þjónustu sem við getum. Hann á að gera það á jákvæðan hátt og ég er á því að ef við
erum með jákvæðara starfsfólk – það skiptir ekki máli hvort það sé leikskólakennari,
grunnskólakennari, starfsmaður í þjónustumiðstöð eða starfsmaður í íþróttahúsi – ef
starfsfólki okkar líður vel í vinnu, þá veitir það betri þjónustu.

Við þurfum góðan leiðtoga, sem getur unnið og fengið fólk að vinna með sér.